Samtang hilom ug mingaw pa ang kadalanan samtang ang kadaghanan tulog pa, aduna'y usa ka inahan nga sayo pa kaayong naglinya sa People's Day program ni Mayor Klarex Uy, adlaw'ng Miyerkules, Mayo 6, sa city hall, dala ang dako nga paglaum alang sa iyang anak.

 

Alas 4:00 pa lang sa kadlawon, milinya na si Winnilyn Navarro sa People’s Day aron mangayo og medical assistance alang sa iyang anak nga adunay impeksyon sa mata.

 

Si Winnilyn usa ka inahan sa lima ka mga anak ug nagtrabaho usab isip Barangay Nutrition Scholar (BNS) sa Barangay Bayabas. Matag adlaw, iyang gipas-an ang bug-at nga responsibilidad isip alagad sa komunidad ug haligi sa ilang panimalay. Apan luyo sa iyang daghang papel, ang iyang labing mahinungdanong tahas mao ang pagka-inahan.

 

Taliwala sa iyang kakapoy sa pag-linya, dako ang pasalamat ni Winnilyn nga aduna'y People's Day program si Mayor Klarex Uy. Matud pa niya, dako kini nga tabang sa mga nanginahanglan ug siya naglaum nga daghan pa usab ang matabangan niini.

 

Dugang niini, ang People's Day, nakadugang kaniya og kagaan sa iyang kasingkasing human nakasinati nga adunay Mayor Klarex Uy nga andam maminaw ug mohatag og dinaliang "medical assistance" alang sa mga nanginahanglan.

 

Dungan sa nagkaduol nga Mother’s Day, ang istorya ni Winnilyn nagsilbing pahinumdom sa gugma nga wala'y kondisyon, ang gugma sa inahan nga andam mo-antos sa kakapoy aron lamang masiguro nga anaa sa maayong kahimtang ang iyang mga anak. (NLB/CIO/Photo by Roel Felicitas/CIO)