Puno sa pasalamat ug paglaum ang kasingkasing ni Michelle Angele Llego, usa ka inahan nga lumulupyo sa St. Ignatius, Kauswagan, human niya madawat ang tabang alang sa iyang lima ka tuig nga anak nga si Zacchaues Christian Cezar nga adunay gihambin nga sakit sa liog.

 

Matud pa sa inahan, tulo ka bulan pa lamang ang bata sa dihang una niyang namatikdan ang gamay’ng lusay sa liog sa iyang anak. Apan samtang nagkadako si Zacchaues, mihinay-hinay ug kadako ang lusay hangtod nakaapekto na kini sa iyang pagtulon ug pagsulti.

 

Bisan pa sa kalisod sa ilang kahimtang ug kakulang sa kwarta, wala mawad-i og paglaum ang inahan nga makapangita og paagi aron matabangan ug mapatan-aw sa doktor ang iyang anak.

 

Tungod niini, niduol siya kang Mayor Klarex Uy aron mangayo og tabang alang sa dugang nga check-up sa bata. Dako ang iyang pasalamat sa tabang nga iyang nadawat pinaagi ni Mayor 'Klarex' nga nakahatag og kahigayunan aron mapa-check-up si Zacchaues sa JR Borja General Hospital ug mahatagan og referral para ma CT scan siya sa City Hospital.

 

Alang kang Michelle, dako kaayong kahupayan nga adunay mga tawo ug programa nga andam motabang sa mga ginikanan sama niya nga nag-atubang sa kalisod ug pagsulay alang sa kahimsog sa ilang anak.

 

Bisan pa sa mga hagit, nagpabilin siyang malaumon nga pinaagi sa suporta nga ilang nadawat, mamaayo ra usab ang iyang anak sa umaabot. (DYM/CIO/Video by Iren Fuentes/CIO)