GITUNOL sa Department of Labor and Employment Field Office - Cagayan de Oro pinaagi ni OIC – Field Office Head Charlton James R. Busa, ang balor P3M livelihood assistance sa 26 ka mga indibidwal ug walo ka grupo gikan sa nagkadaiyang barangay sa dakbayan, Lunes, Hulyo 6, 2026 sa City Hall quadrangle.

 

Ang nasangpit nga mga indibidwal nga benepisyaryo nakadawat og livelihood assistance balor P30,000 ngadto P50,000 matag usa.

 

Samtang, walo usab ka grupo ang nakasulod sa programa nga gilangkoban sa Barangay Bayabas Women Development Association (P260,000), Singapore-Carcosa Trisikad Operator Drivers Association (P250,000), Camp Alagar Senior Citizens Association (P250,000), Plaza Divisoria Therapeutic Massage Group (P200,000), Barangay 32 Senior Citizens Association (P250,000), Barangay Carmen Oro Women’s Association (P250,000), Makabangko Tribo sa Higaonon Abaca Farmers Association (P500,000), ug Bitaug Senior Citizen Organization (P200,000).

 

Matud ni Public Employment Service Office Manager Kathleen Kate Sorilla, ang nasangpit nga livelihood assistance usa lamang sa daghan pang mga programa sa panginabuhian nga gitanyag sa DOLE pinaagi sa hugot nga koordinasyon sa syudad sa pagpangulo ni Mayor Rolando ‘Klarex’ Uy pinaagi sa buhatan sa PESO, ug sa hugot nga suporta ni City Councilor Gilda Go, ang chair sa Committee on Cooperatives, Labor and Employment sa konseho. (AGP/Photos by Reynan Baylin/CIO)