DAMGO nga natuman ang gibati sa mga molupyo sa Sitio Bankers, Barangay Tignapoloan human gitunol ang bag-ong Child Development Center (CDC), bag-ohay lamang.

 

Nasayr’ang niadto pa'ng tuig 2011, wala'y permanenteng CDC ang Sitio Bankers, Barangay Tignapoloan tungod sa nagkadaiyang mga hagit sama sa kakulangon sa yutang gipanag-iya sa barangay ug limitado nga pundo alang sa pagtukod tungod sa ubos nga kita sa barangay hinungdan nga wa'y kabutangan sa kalipay ang nabati ni Child Development Worker Vivian Abaro, ang assigned CDW sa maong lugar.

 

Ang maong Child Development Center ubos sa pagpaningkamot ni Child Development Worker Vivian Abaro, Barangay Tignapoloan Council pinangulohan ni Punong Barangay Nancy ug City Social Welfare and Developement Department-Early Childhood Care and Development Section.

 

Tumong niini ang mahatagan og edukasyon ug matudloan ang mga kabataan nga nag-edad og 3 hangtud 4 anyos nga na-enroll ubos sa Early Childhood Care and Development Program, mao kini ang programa sa pangpangandam sa Kindergarten. (NLB/CIO/photos courtesy of ECCD)