“We, the City College of Cagayan de Oro build opportunities that can transform not only individual lives but entire families and communities. Accessible education opens doors to meaningful learning and a brighter future.’

 

Kini ang mensahe ni City College of Cagayan de Oro President Dr. Jestoni P. Babia atol sa ika-14th graduation ceremony sa City College of Cagayan de Oro - Technical Skills and Technology Institute (TSTI), adlaw’ng Miyerkules, Hulyo 8 ning tuig diin 382 ka mga studyante ang malampusong mitapos sa kursong Electrical Installation and Management NC I & II, Shielded Metal Arc and Welding NC I& II, Housekeeping NC I & II, Carpentry NC I & II ug Barangay Health Services NC II.

 

Matud pa ni Dr. Babia, nagtuo ang CCCDO nga walay damgo nga mapugngan tungod lamang sa kahimtang sa kinabuhi sa usa ka estudyante. Ang CCDO nagpabiling matinud-anon sa iyang misyon nga mas sayon maabot ang dekalidad nga edukasyon alang sa tanang nangandoy nga makapadayon sa ilang pagtuon ug makahimo og mga oportunidad nga magdasig sa paglaum, pagtubo, ug kalampusan.

 

Dugang pa ni Dr. Babia, ang labing dakong kalampusan sa institusyon dili masukod pinaagi sa mga ranggo lamang, kondili pinaagi sa mga kinabuhing ilang natandog ug sa mga graduates nga nagpadayon sa panan-awon sa kaugmaon.

 

Misaksi usab si City Education Committee Chairperson Councilor Moreno Daba IV, TESDA Regional Director Rafael Abrogar II TESDA Provincial Director of Misamis Oriental - Dir. Marigold Cherie Garrido ug si Dr. Marte Emperio, Mindanao TVET Association President isip keynote speaker.

 

Kabahin kini sa tinguha sa lokal nga kagamhanan ubos sa pagpanguna ni Mayor Rolando ‘Klarex’ Uy nga makahatag og accessible nga edukasyon alang sa mga kabatan-on nga walay igong kapasidad sa pagbayad sa matrikula sa kolehiyo.

 

Tungod niini, ang damgo sa daghang kabatan-onan nga makapadayon og kolehiyo dili na lamang usa ka handom, kondili usa na ka realidad pinaagi sa libreng edukasyon nga ilang natagamtaman. (MDS/Photos by KIM ZALDIVAR/CIO)