GIPADAYAG ni Mayor Rolando `Klarex’ Uy ang subling pagpatuman sa Memorandum Circular sa Department of the Interior and Local Government (DILG) nga mao ang road clearing.

“Dili ma-decongest ang trapiko kung ang kadalanan gihimo na nga parkingan ug grahian hinungdan nga dili mawala ang kapiot sa kadalanan ug kabarangayan” matud ni Mayor Klarex atol sa Flag Raising ceremony sa city hall Lunes, Agosto 3, 2026.

Alayon niini, gihangyo ni Mayor Klarex ang mga kadagkuan sa Roads and Traffic Administration (RTA) ug Regulatory Compliance Board (RCB) sa subling pagpatuman sa road clearing operation.

Lakip sa gihangyo sa mayor ang presidenti sa Association of Barangay Captain nga si City Councilor Marlo Tabac aron ipadangat sa mga punong barangay ang subling pagpatuman sa road clearing diha sa ilang tagsa-tagsa ka barangay.

Matud ni Mayor Klarex nga hangyoon niini si City Police Director Col. Dexter Paje sa Cagayan de Oro City Police Office (COCPO) nga ubanan og pulis ang team kung maglisod kini pagpatuman sa road clearing.

Gipasabot sa mayor nga gikinahanglan niya ang tabang sa tanan sa pagpatuman sa maong balaod kay alang man kini sa kaayohan sa syudad ug sa katawhan. (ALR/CIO/Photos by Reynan Baylin/CIO)