ISIP kabahin sa pagsaulog sa ika-63 nga Founding Anniversary sa JR Borja General Hospital (JRBGH), nagpahigayon og usa ka Community Health Lecture Series nga nagtumong paghatag og importanteng kahibalo ug praktikal nga kahanas sa pagluwas og kinabuhi, adlaw’ng Martes, (Agosto 4).

 

Tumong sa maong lecture series nga mapalambo ang kahibalo sa mga mulupyo sa dakbayan kalabot sa emergency ug disaster preparedness aron mas andam sila sa pag-atubang panahaon sa mga wala damhang emerhensiya.

 

Ang lecture series gihimo sa duha ka batch, nga gipahigayon Agosto 4 ug ipadayon usab sa Agosto 6.

 

Sa unang batch, gihisgutan ang Hands-Only Cardiopulmonary Resuscitation (CPR) ug First Aid Basics, diin adunay hands-on training ug aktuwal nga demonstrasyon aron mas masabtan ug mapraktis sa mga partisipante ang hustong pamaagi sa paghatag og unang tabang.

 

Lakip sa mga mitambong ang mga empleyado sa DOST, mga residente sa Barangay Carmen, mga kawani sa Commission on Population and Development (CPD) Region X, ug pipila ka mga staff sa JR Borja General Hospital. (DYM/CIO/Photos by Johnel Neri/CIO)