NAGPAHIGAYON og Safe Motherhood Caravan Program ang lokal nga kagamhanan pinaagi sa City Health Office (CHO) alang sa mga inahan sa Barangay Iponan niadtong Miyerkules, Agosto 19, ning tuig.

 

Ang maong caravan usa ka community-based outreach ug health education program nga gipangulohan sa City Health Office (CHO), uban sa pakigtambayayong sa mga grupo sama sa Philippine Business for Social Progress (PBSP) ug mga pribadong organisasyon sa panglawas.

 

Lakip sa mga nag-unang tumong sa programa mao ang pagpalambo sa kahimsog sa mga inahan, pagdasig sa mas daghang pagpanganak sa mga pasilidad panglawas, paglikay sa mga risgo nga may kalabotan sa pagmabdos, ug paghatag og tukmang impormasyon aron matubag ang mga isyu sa teenage pregnancy.

 

Gitanyag usab ang mga serbisyo sama sa prenatal ug postnatal care, mga sesyon sa health education, family planning, ug uban pang suporta alang sa mga inahan ug ilang pamilya.

 

Nanghinaot si Mayor Rolando ‘Klarex’ Uy nga pinaagi sa maong programa, mas mapalapdan pa ang kahibalo sa mga inahan kabahin sa hustong pag-atiman sa ilang kaugalingon ug sa ilang mga anak. Gidasig usab niya ang mga inahan nga gamiton ang mga serbisyo panglawas nga gitanyag sa lokal nga kagamhanan aron mapanalipdan ang ilang kahimsog ug malikayan ang mga risgo sa panahon sa pagmabdos ug pagpanganak. (MDS/CIO: Photos Courtesy to CHO)