ISIP pahimangno ug abiso, gipahinumdoman sa lokal nga kagamhanan ubos sa pagpanguna ni Mayor Rolando ‘Klarex’ Uy, pinaagi sa City Health Office (CHO) ug sa pakigtambayayong sa Department of Health (DOH), ang publiko nga magmatngon batok sa posibleng heat-related illnesses ilabina panahon sa taas nga heat index.

 

Matud sa PAG-ASA heat index classification, ang 27-32°C giila nga ‘Caution,’ 33-41°C nga ‘Extreme Caution,’ 42-51°C nga ‘Danger,’ ug 52°C pataas nga ‘Extreme Danger.’

 

Lakip sa kasagarang sintomas sa sakit tungod sa kainit ang grabeng pagpasingot, kakapoy ug pagkalipong o pagngitngit sa panan-aw panahon sa pagtindog, paspas apan huyang nga pulso, ingon man kasukaon ug pagsuka.

 

Giawhag ang publiko nga limitahan ang pagpabilin sa gawas ilabina panahon sa pinakainit nga oras, kanunay nga mag-inom og igo nga tubig, ug likayan ang caffeinated ug alcoholic nga mga ilimnon sama sa tsa, kape, softdrinks ug makahubog nga ilimnon.

 

Gisugyot usab ang pagsul-ob og panalipod batok sa adlaw sama sa kalo, payong ug ipahigayon ang mga kalihokan sa gawas panahon sa mas bugnaw nga oras.

 

Kung adunay gidudahang heat-related illness, dad-a dayon ang apektadong tawo sa landong o bugnaw nga lugar, ipataas ang mga tiil, hatagi og bugnaw nga tubig, tangtanga ang sobra nga bisti, butangi og bugnaw nga tubig ang panit ug ice packs sa mga lutahan, ug pangayo dayon og medikal nga pag-atiman kung gikinahanglan. (MDS/CIO/PubMat Courtesy to CHO)