GISUGDAN na sa kagamhanan ning syudad ang pagtukod sa usa ka multi-purpose building project nga nahimutang duol sa may Alco Homes, barangay Carmen nga gipundohan sa nasudnong kagamhanan balor og P150 milyones alang sa phase 1 pinaagi sa Local Government Support Fund-Financial Assistance to Local Government Units (LGSF-FALGU).

 

Gani, mismo si Department of the Interior and Local Government (DILG 10) Regional Director Bruce A. Colao, uban ni DILG City Director Ellaine Josephine Depaur, ug mga representante sa Commission on Audit, ang nangulo sa on-site inspection, Biyernes, Septiyembre 4.

 

Mitambong usab sa maong ocular inspection si City Councilor Al Legaspi Sr., kinsa chairman sa Committee on Public Works sa konseho, ingon man si City Engineer Joel Momongan, Acting City Planning and Development Coordinator Engr. Ardines Cabrera ug Assistant City Information Officer Ian Fuentes.

 

Ang LGSF-FALGU inisyatiba sa nasudnong kagamhanan aron matabangan ang mga LGUs sa tibook nasud sa pagpatuman og nagkadaiyang ‘developmental projects’ sa ilang lokalidad.

 

Ang multipurpose building project nga hitsas sa bleachers ug adunay gibana-banang 2,500 seating capacity magsilbi usab nga ‘mini convention and recreational center’, diin ipahigayon ang mga dagkong social ug sporting events sa syudad. (AGP/Photos by Jhonel Neri/CIO)