Gisaulog sa City Hospital-Lumbia ang ika-upat nga Founding Anniversary adlaw’ng Biyernes, Setyembre 4 ning tuig, ubos sa tema “Greater at Four: A Journey of Compassionate Care for Every Generation.”

 

Sulod sa upat ka tuig, gipaningkamotan ni Chief of Hospital Dr. Ferdinand Miranda, uban sa tibuok pwersa sa ospital, ang paghatag og dekalidad ug maamumaho’ng serbisyo panglawas alang sa mga Kagay-anon.

 

Matud ni Dr Miranda, ang kalamboan sa ospital bunga sa paningkamot ug kontribusyon sa matag miyembro niini ug nanghinaot kini nga padayon nga maghatag og paglaum ilabina sa mga anaa sa hinterland nga makahatag og pagtagad sa mga nanginahanglan og serbisyong medical.

 

Kabahin sa maong selebrasyon, gipahigayon usab ang Hospital Annual Report, diin gipakita ang mga nahimo nga kalampusan sa City Hospital-Lumbia sulod sa upat ka tuig nga pagserbisyo.

 

Ubos sa usa ka misyon sa ospital nga “To bring healthcare closer to every Kagay-anon,” gipaningkamotan nila nga mapalambo ug mapalig-on ang paghatag serbisyo aron masiguro ang accessible ug dekalidad nga healthcare alang sa tanan. Sa laing bahin,

isip kabahin sa ilang tinuig nga pahalipay sa mga pasyente, nag apod-apod usab ang ospital og lima ka kilo nga bugas ngadto sa mga pasyente, nga gikan kang City Mayor Rolando “Klarex” Uy.

 

Mitambong usab sa maong kalihokan si Chief of Staff Shiela Lumbatan isip representante ni Mayor Klarex Uy, uban usab si CDRRMD Department Head Nick Jabagat, Acting Chief of Hospital sa City Hospital-Tablon Dr. Geneen Macadaig, ug Chief of Hospital sa JR Borja General Hospital Dr. Michael June Perez.

 

Gisugdan ang kasaulogan pinaagi sa usa ka motorcade ug sundan daun kini sa Fellowship Night sa mga empleyado unyang gabhiona. (DYM/CIO/Photos by Reynan Baylin/CIO)