PORMAL nang gitunol sa lokal nga kagamhanan, pinangulohan ni Mayor Rolando ‘Klarex’ Uy, ang Learning Event Center (Gymnasium) nga nagkantidad og kapin kon kulang P50 milyones ngadto sa Cagayan de Oro National High School-Junior High School (CDONHS-JHS), adlaw’ng Huwebes, Oktubre 1, ning tuig.

 

Ang maong turnover ceremony nagtimaan sa usa ka bag-ong hugna sa mga estudyante ug magtutudlo sa ilang pagkat-on, pagtudlo, pag-ensayo sa sports, ug pagpahigayon og nagkalain-laing kalihokan sa eskwelahan.

 

Mapasalamaton usab si CDONHS-JHS School Principal Mr. Elizer Teruel kang Mayor Klarex sa paghatag sa maong pasilidad, nga dako og ikatabang alang sa mga batan-on.

 

Misaad usab siya nga ampingan ug gamiton og sakto ang bag-ong gymnasium.

 

Nagtuo usab si Mayor Klarex nga ang mga estudyante sa Cagayan de Oro angayan makadawat og pinakamaayo nga ikahatag sa lokal nga kagamhanan alang kanila.

 

Atol sa seremonya, mipakita usab og talento ang mga estudyante gikan sa Special Program for the Arts pinaagi sa ilang matahom nga mga sayaw ug uban pang mga pasundayag.

 

Mitambong sa maong turnover ceremony ang mga opisyal sa dakbayan, mga representante sa DepEd Division of Cagayan de Oro pinangulohan ni ASDS Audie Borres, mga sakop sa Nazareth Barangay Council, department managers, mga miyembro sa Local School Board (LSB), mga magtutudlo, ug mga estudyante sa Cagayan de Oro National High School-Junior High School. (MDS/CIO/Photos by: Kim Zaldivar/CIO)