Wednesday, 07 October 2026 09:36

WATER TREATMENT FACILITY SA COGON MKT. OPERATIONAL NA SA DILI MADUGAY

Written by ALR
OPERATIONAL na sa dili madugay ang P12-M Water Treatment Facility nga gi-muntar diha sa Cogon Market human gisusi sa mga representante sa Japan International Cooperation Agency (JICA) ang proyekto atol sa ilang pagbisita sa Cogon market bag-ohay lang.
 
Gipasabot ni City Economic Enterprises and Business Development Administration Acting General Manager Jocelyn Peñalosa nga ang JICA maoy naghatag og pundo ngadto sa syudad ubos sa administrasyon ni Mayor Rolando `Klarex’ Uy alang sa nasangpit nga proyekto.
 
Sa pagsusi sa mga tinugyanan sa Hinode Sangyo Co., Ltd gikan sa nasud sa Japan ilang gikumpirma nga hapit na magamit ang water treatment facility diin ang pag-abot sa mga ekipo ug pag-instalar na lang niini ang kulang.
 
Samtang gikalipay ni Peñalosa ang maong kalambuan, gipasalamatan niya ang JICA nga mitabang sa syudad ug sa pagsalig sa administrasyon ni Mayor Klarex alang sa katukoran sa nasangpit nga proyekto. (ALR/CIO/Photos from CEEBDA)