Gilaraw karon ni City Councilor Romeo Calizo nga magahinan og igong pundo ang Aftercare Program sa Community-Based Drug Rehabilitation Program (CBDRP) aron magmalungtaron ang programa ubos sa City Anti-Drug Abuse Council (CADAC).

 

Mao kini ang pamahayag ni Kag. Calizo atol sa pagtapos sa tulo ka adlaw nga kalihokan sa CADAC nga giulohan og Facilitator’s Training on: YakapBayan Aftercare Program adlaw’ng Huwebes Marso 31, nga gi-facilitate sa USAID ug giapilan sa mga community-based managers gikan sa nagkadaiyang barangay.

 

 

 

Isip chairman sa CADAC, si Kag. Calizo mipasabot nga dili mahimo nga kuhaon tanan gikan sa barangay ang pundo alang sa Aftercare tungod kay dili kini makaya sa barangay.

 

Siya midugang nga pinaagi niini, mas molungtad pa ang programa ug daghan pa nga mga persons who used drugs (PWUDs) ang madasig nga magbag-o sa ilang kinabuhi.

 

Alayon niini, gipasalamatan ni Kag. Calizo ang USAID sa kanunay nga pagsuporta ug pagtabang sa mga programa sa syudad pinaagi sa CADAC diha sa kampanya batok gidiling druga. (ALR/Photos by Joshua Luingas-CIO)