Tungod sa hulga sa Bird Flu o Avian Influenza (AI) nga naka-apekto sa pipila ka lugar sa Southern Mindanao, gipahimutang karon sa high level alert ang syudad sa Cagayan de Oro, sigun pa sa gibutyag ni Acting City Veterinarian Dr. Lucien Anthony Acac.

 

Hinuon, nagpabilin nga AI-free ang syudad, apan bisan pa man niini, nagpadayon sa ilang monitoring ang mga personahi sa City Veterinary Office, partikular na ang task force nga gimugna ni Mayor Oscar Moreno niadtong pagsulod sa African Swine Fever (ASF) sa Cagayan de Oro.

 

 

Nagpahigayon og poultry population survey ang task force sa mga rural barangays ilabina sa hinterlands isip ‘pre-emptive measure’ kabahin sa kahimsog sa mga poultry animals human sa heightened alert nga gipatuman sa Department of Agriculture batok Avian Influenza virus.

 

Lakip sa gi-inventory sa task force ang urban ug numbered barangays, ingon man ang pagpanghatag og leaflets aron ma-edukar ang katawhan kalabot sa AI virus.

 

Gibisitahan usab ni Dr. Acac ang mga animal quarantine checkpoints nga gipahimutang sa mga borders aron masiguro nga luwas sa sakit ang mga livestock ug livestock products nga mosulod sa syudad, uban ang insaktong dokumento alang sa pag-transport. (ALR/CIO) Photos from CVO