Sa tinguha nga mahatagan og dignidad ang kapulisan ning syudad, gilaraw karon sa administrasyon ni Mayor Klarex nga magtukod og dugang police station.

Gani, usa sa gilantaw ni Mayor Klarex nga makabaton na og kaugalingong presinto ang Police Station 1 Divisoria diin sa kasamtangan anaa sa likod nga bahin sa City Tourism Hall.

 

“Sayang kaayo ang nindot nga uniporme sa atong kapulisan unya walay kaugalingon nga presinto,” pamahayag ni Mayor Klarex atol sa paghinabi kaniya sa usa ka istasyon sa radyo, Huwebes, Hulyo 21.

Ang mayor namahayag nga sa kanhi Post Office niya laraw itukod ang presinto sa Police Station 1 kay daplin ra sa karsada ug sayon tultulon sa mga nagkinahanglan og police assistance.

Duha usab ka mga police stations ang gusto tukuron ni Mayor Klarex sa Uptown area, partikular na sa Upper Balulang ug Upper Carmen.

Gihulat na lamang niini ang developer nga modonar og 700 sq. meter nga luna alang sa maong proyekto. (ALR/CIO)