“Gamay’ng kahasol, apan bililhon ug dako kaayong kapuslanan sa imong kaugalingon nga makahatag og proteksyon sa panglawas ug kalig-on sa immune system nga dili ka matakdan sa COVID, ug kung matakdan sa COVID, makasukol na imong panglawas”.

 

 

Kini ang mensahe ni Mayor Klarex Uy atol sa paglusad sa ‘PinasLakas’ COVID-19 vaccination campaign sa Department of Health nga gipahigayon sa St. Augustine Metropolitan Cathedral, Hulyo 26.

Gipunting ni Mayor Klarex nga ang himsog nga panglawas ang pinakadakong bahandi sa usa ka tawo, busa subli kining nanawagan nga magpabakuna na batok COVID.

 

Ang maong ceremonial launching nahimong posible tungod sa pagtambayayong sa DOH-Region 10, kagamhanang lokal sa syudad, Archdiocese sa Cagayan de Oro, opisyales sa barangay, pribado ug pampublikong sektor.

Gipasabot ni DOH regional director Dr. Jose R. Llacuna Jr nga laraw sa ‘PinasLakas’ nga makab-ot ang 90% sa target senior citizens nga makakompleto sa primary COVID-19 vaccine series o first ug second doses sulod sa unang 100 days ni President Bongbong Marcos Jr.

 

 

Samtang, 50% usab sa target eligible population kon 12 anyos pataas nga matupokan sa first booster dose.

Gihingusgan ni Dr. Llacuna nga ang pagpamakuna usa sa mga epektibo nga istratehiya batok sa unsa mang makatakod nga sakit sama sa COVID.

Gisuguro usab niini nga adunay igong supply sa bakuna ang ahensya alang sa nagpadayong vaccine rollout sa syudad.

 

Mitambong usab sa launching si Archbishop-Emeritus Antonio J. Ledesma ug Fr. Daniel D. Coronel, COVID-19 Emergency Operation Center manager Mr. Oliver V. Egypto, department ug EOC cluster heads, City Health Officer Dr. Rachel D. Dilla, City Councilor Jose Pepe Abbu Jr., George Goking, Edgar Cabanlas, ug Dra. Maria Lourdes S. Gaane. (AGP/Photos by Roel Felicitas & Rod Constantino/CIO)