Gidasig ni City Councilor Romeo Calizo, co-chairman sa City Anti-Drug Abuse Council (CADAC) ang 12 ka mga kliyente sa plea bargain nga dili sayangon ang higayon nga gihatag kanila sa gobyerno aron mabag-o ang ilang kinabuhi atol sa commencement activity, Martes Hulyo 26, nga gipahigayon sa Cronin Hall, St. Augustine Cathedral.

 

Ang 12 ka mga kliyente migraduwar sa Community-Based Drug Rehabilitation Program (CBDRP) ubos sa Oro Citizen’s Wellness & Development Center (OCWDC) nga maoy usa sa mga rekisitos nga gimando sa Korte diha sa ilang pag-avail sa plea bargain human nadakpan tungod sa pagkalambigit sa gidiling druga.

 

Sa maong programa nanumpa ang mga kliyente nga padayonon nila ang kabag-ohan nga ilang nasugdan ug natun-an sa OCWDC dili lang para sa ilang kaugalingon apan alang usab sa ilang pamilya.

 

Samtang mipadayag usab sa iyang suporta si Vice Mayor Jocelyn Rodriguez ngadto sa mga kliyente ug nagpasalig nga andam ang iyang buhatan motabang sa ilang panginahanglanon.

 

 

Lakip sa mitambong sa kalihokan si Office for Community Affairs Head Oliver Egypto, ug mga kadagkuan ug representante sa Philippine Drug Enforcement Agency (PDEA-10), Cagayan de Oro City Police Office (Cocpo), Archdiocese of Cagayan de Oro, ug uban pa nga buhatan ingon man mga pamilya sa mga kliyente. (ALR/CIO/Photos by Roel Felicitas/CIO)