Gikalipay ni Mayor Rolando `Klarex’ Uy ang uwahing kalamboan sa syudad diin 22 ka mga barangay ang nadeklarar na nga drug-cleared ug drug-free pinaagi sa Philippine Drug Enforcement Agency (PDEA-10).

Ang kampanya batok gidiling druga ug ang pagsugpo niini maoy usa sa mga agenda ug gihingusgan sa administrasyon ni Mayor Klarex.

 

Sa 22 ka mga barangay, 13 niini ang gi-classified nga drug-cleared samtang 9 ang drug-free. Ang 13 mao ang Brgys. 5, 6, 8, 26, 37, 11, 19, 16, 30, 23 ug ang bag-ong nadeklarar Brgys 1, 7 ug 14. Ug ang siyam nga drug-free mao ang Barangays 21, 2, 3, 4, 9, 20, 39, 40, ug 38.

 

Nasayran nga managlahi ang drug-cleared ug drug-free nga classification diin gipasabot ni PDEA-10 agent Expedito Cardona Jr, nga ang drug-cleared barangay apektado na sa druga sugod sa sinugdanan diin anaay natumbok nga mga drug personalities ug mga tawo nga nigamit sa gidili nga druga apan adunay mga intervention program nga gihimo ang barangay pinaagi sa Community-Based Drug Rehabilitation Program (CBDRP) nga nakapaundang sa maong ilegal nga kalihokan.

 

Samtang madeklarar usab nga drug-free ang usa ka barangay tungod kay walay na-monitor nga kalihokan sa gidiling druga o pagpamaligya ingon man mga tawo nga nigamit sa illegal drugs.

Gibutyag ni Cardona nga aduna pa 58 ka mga brgy sa syudad nga wala pa madeklarar tungod kay kamulo pa ang drug-clearing program sa barangay ug mga intervention.

Si City Councilor Romeo Calizo, co-chairman sa City Anti-Drug Abuse Council (CADAC) malaumon nga madugangan pa ang ihap sa mga barangay nga mahimong drug-cleared ug makab-ot sa syudad ang tinguha nga mahimong drug-free city. (ALR/CIO)