BISAN pa man sa pagsaka sa kaso sa COVID 19 dinhi sa Cagayan de Oro, gipasabot ni Dr. Ted Yu Jr, medical officer sa City Health Office (CHO), nga anaa pa gihapon sa low risk level ang Average Health Care Utilization Rate (HCUR) sa syudad basi sa key indicators sa FASSTER Philippines.

 

Sa taho ni Dr Ted Yu atol sa sinemanang COVID 19 press briefing adlaw’ng Lunes, anaa pa sa 15.19% ang HCUR sa syudad ug maoy usa sa mga indicators nga nagpabilin sa Alert Level 1 ang Cagayan de Oro.

Dugang pa ni Dr Yu nga ubos pa usab ang Average Daily Attack Rate (ADAR) sa syudad nga anaa lamang sa 4.66, diin ang threshold level nga above 7 ang angay bantayan.

 

Apan bisan pa man niini, kanunay ug hugot ang panawagan ug hangyo ni Mayor Rolando “Klarex” Uy ug sa CHO sa pagpangulo ni City Health Officer Dr. Rachel Dilla nga sundon kanunay ang minimum public health standards ug ang pagpabakuna ug pagpa-booster sanglit mao kini ang usa nga makatabang nga malikay ang katawhan sa moderate to severe cases kon ugaling mataptan sa virus. (ACM/CIO)