Nagkauyon ang City Hall ug Kapitolyo sa sugyot sa National Telecommunications Commission kon NTC nga gamiton sa mga telecommunication companies ang ‘underground cable duct’ sa Misamis Oriental Telephone System kon Misortel.

Kini human mitanyag og ‘win-win solution’ si NTC 10 Regional Director Ted Buenavista, Jr. atol sa breakfast meeting kaganihang buntag tali ni City Mayor Rolando “Klarex” Uy ug Misamis Oriental Governor Pedro M. Unabia sa tuyo nga mahatagan og kasulbaran ang problema sa ‘spaghetti wires’ dinhi sa syudad.

 

Kahinumduman nga gi-instalar sa Misortel ang mga ‘underground fiber optic cables’ niadtong 1990s pinaagi sa kompanya nga Samsung gikan sa South Korea, apan wala na kini magamit karong panahona human nabangkaruta ang Misortel.

Gilantaw nga makabenepisyo ang syudad sa maong sugyot sa NTC sanglit nahiuyon kini sa paningkamot sa syudad pinaagi sa Task Force Hapsay Kable nga malimpyohan ang nagkagidlay nga ‘spaghetti wires’.

 

Sa kabahin sa probinsya sa Misamis Oriental, mokita usab kini gikan sa renta sa mga telecom companies nga maoy mogamit unya sa ‘underground cable duct’ sa Misortel aron wala nay mga kable nga magbitay-bitay sa mga poste. (IAF-CIO/photo by Aicy Soriano/CMO)