SA nagpadayong kalamboan sa City Memorial Park o kanhi Bolonsori Public cemetery diha sa barangay Camaman-an ning syudad, dugang mga ekipo ang napalit sa LGU-CDO bag-ohay lang.

Matud ni Ms. Sol P. Mosqueda, focal person sa City Memorial Park project, unom (6 )ka unit sa hydraulic scissor lift ang napalit sa syudad aron mas mapasayon ang paglubong sa mas taas nga level nga mga nitso.

Ang maong mga ekipo kabahin sa pundo nga gitagana alang sa pagpalambo sa maong proyekto.

 

Ang redevelopment himuon ‘phase-by-phase’ ug sugdan kini sa perimeter wall ug 5- storey columbarium nga maoy plastaran sa mga una nang nalubong sa Phase 1 ug Phase 2.

Matud ni Engr. Armen Cuenca, hepe sa City Local Environment and Natural Resources Office (Clenro) ug secretariat sa City Memorial Park Board, mokabat sa P367 million ang pundo nga gigahin alang sa maong redevelopment project diha sa kapin 10 ektaryang luna sa Bolonsori.

 

Dugang pa niini, mahinungdanon nga mapaspasan ang proyekto sanglit apektado na ang ‘groundwater’ sa maong dapit resulta sa ‘formaldehyde’ ug gikan sa duga sa lawas sa tawo.

Kahinumdoman nga halos 40 ka tuig na ga-operate ang Bolonsori cemetery diin dili moubos sa 1,200 ang gilubong sa maong sementeryo matag tuig. (ACM/Photos by REYNAN BAYLIN/CIO)