Nunot sa kamandoan ni Mayor Rolando `Klarex’ Uy nga mapadali ang paghatag og serbisyo ngadto sa katawhan, nagpahigayon og upat ka adlaw nga raffling ang City Housing & Urban Development Department (CHUDD).

 

Ang kalihokan gisugdan karong adlawa Agosto 23, diha sa Duaw Park ug pagasundan kini sa Agosto 26, 30, ug 31 alang sa mokabat 720 ka benepisyaryo.

Karong adlawa, 72 units ang gi-raffle sa mga personahi sa CHUDD alang sa 72 usab ka benepisyaryo.

 

Gipasabot ni Maria Liza Inting sa CHUDD nga tumong sa raffling nga matumbok sa mga benepisyaryo kung asa sila nga unit mabutang, ground floor o kaha sa 2nd floor.

Samtang una nang gipadayag ni CHUDD Acting Head Atty. Jeoffrey Namalata nga mas gipahan-ay pa nila karon ang mga pamaagi, proseso ug paglihok sa mga dokumento aron paspas nga serbisyo usab ang mahatag ngadto sa katawhan.

 

Gani, nagmugna og selection committee nga gilangkoban sa lima ka miyembro diin ang ilang tahas mao ang pagsala sa mga aplikante ug sa ilang mga dokumento sa housing program sa syudad. (ALR/CIO/Photos by Rod Constantino/CIO)