Wednesday, 31 August 2022 06:57

CHUDD: Reloc sites, housing projects paspas ang kalambuan

Written by
Mapasigarbuhon ang City Housing & Urban Development Department (CHUDD) sa pagpangulo ni Acting Head Atty. Jeoffrey Namalata sa kalambuan sa nagkadaiyang relocation sites ug housing projects sa syudad.
Sa gipahigayon nga site inspection nila ni Kagawad Edgar Cabanlas ug Atty. Namalata, nasayran nga 56 sa 164 housing units ang nibarog ug padayong gitukod diha sa Barangay San Simon.
Kini nga mga panimalay alang sa mga indirectly affected families (IAFs) nga naigo sa Mega-dike project dapit sa Barangay Kauswagan area.
 
May be an image of 6 people and people standing
 
Samtang, kumpleto na ang land development sa Pagatpat Valley Residences, ug anaa sa 70 porsiyento ang land development sa sitio Pamalihi nga ‘lot only’ nga pulos nahimutang sa Barangay Pagatpat.
Lakip usab sa nakumpleto ang land development sa Macadam road sa Muslim-Christian, ug Highland Ville relocation sites nga nahimutang sa Palalan, Brgy. Lumbia diin gikabutyag nga aduna kini dugang pundo alang sa full land development.
 
May be an image of 1 person, tree and outdoors
 
Kamulo na usab ang pagtrabaho sa land development sa 10 ka ektarya nga luna sa housing project alang sa mga empliyado sa city hall nga gibana-bana mahuman sulod sa duha ka tuig ug tunga.
Kini nga mga kalambuan nahimo nunot sa hangyo ug kamanduan ni Mayor Rolando `Klarex’ Uy nga paspasan ang mga housing projects sa syudad aron daghan pang katawhan ug pamilya ang makaangkon og pinuy-anan, ilabina kadtong mga naapektuhan sa mga infrastructure projects sa gobyerno.
 
Sa maong higayon, gisugyot ni Kag. Cabanlas nga hisgutan sa CHUDD uban sa mga partner agencies, developers, ug stakeholders ang mga pamaagi aron mas mapadali pa ang paghuman sa maong mga proyekto. (ALR/CIO/Photos from CHUDD)