World Health Organization
Department of Health 
MAPASALAMATON ang 66 ka paresan human nakabenepisyo sa libreng mass wedding kon 'Kasalan ng Bayan' nga gipangulohan ni Mayor Klarex Uy, Septiyembre 29, diha sa barangay Puntod covered court, ning syudad.
Usa niini si Tatay Joseph Jumawan ug Nanay Leonila T. Bete, kinsa 50 ka tuig na nga nag-ipon.
"Mas maayo gyud magpakasal. Gani, wa ko nagtuo nga moabot pa ko sa inyong atubangan karon”, matud pa ni Tatay Joseph, kinsa mapasalamaton sa Kahitas-an nga gilugwayan pa ang iyang kinabuhi human nakuryentihan sa miaging adlaw ug hapit wala nakatambong sa kasal.
Ang magtiayon, kinsa adunay unom ka mga anak ug 22 ka apo, gihatagan ni Mayor Klarex Uy og pahalipay nga balor P10,000 tungod kay sila ang pinakadugay nga nag-ipon.
Ang matag magtiayon midawat sa libreng cake, lechon ug wine gikan ni Mayor Klarex Uy, lakip libreng 25-kilo nga bugas gikan ni Liga ng mga Barangay president Alam Lim.
Nagsilbing principal sponsors sila si City Councilors Girlie Balaba, Atty. Jose Pepe Abbu Jr., Aga Suan ug Ian Achas; Punong Barangay Rexie Tinampay sa Barangay Puntod ug misaksi usab sa seremonyas sa kasal si City Administrator Atty. Roy Hilario P. Raagas.
Natapos ang kalihokan pinaagi sa paglagda ni Mayor Klarex sa marriage certificates ug pagpahulagway sa mga magtiayon sa libreng photobooth.
Nahimong posible ang kalihokan ubos sa pagpaningkamot sa City Civil Registry ubos ni City Civil Registrar Evangeline Tapangan, uban sa Philippine Statistics Authority, City Mayor's Office, Community Improvement Division ug City Public Services Department.
Ang 'Kasalan ng Bayan' usa sa mga highlights sa ‘Klarex nga Serbisyo sa Baryo’ program ubos sa administrasyon ni Mayor Klarex Uy kansang tinguha nga makasal ang mga magti-ayon nga dugay nang nagpuyo apan wa'y igong kapasidad nga magminyo. (NLB/CIO/photos by Rod Constantino/CIO)
