World Health Organization
Department of Health 
DAKONG garbo ug kalipay sa mga personahe sa JR Borja General Hospital ang pormal nga pagbukas sa Hemodialysis Unit sa pagpangulo ni Mayor Rolando “Klarex” Uy adlaw’ng Biyernes, Septiyembre 30.
Lakip sa gibuksan ang CT Scan ug RT PCR molecular laboratory niini nga gisaksihan ni DOH Regional Director Jose Llacuna, Councilor Jose Pepe Abbu Jr. ug mga department managers.
Sa mensahe ni Mayor Klarex iyang gipasalamatan ang kanhi administrasyon ug mga namuno sa JRBGH sa ilang panlantaw ug paningkamot nga mapalambo ang maong hospital ug mahatagan og sakto’ng serbisyo ang katawhan ilabina ang mga anaa sa kalisdanan.
“Dako kaayo ang akong kalipay sa kausaban ug kalamboan sa city hospital ug dili kini mahimo kung usa lamang ka tawo ang gilauman, apan kamong tanan nga nagserbisyo ug mitubag sa mga panginahanglan sa katawhan. Nagpasalamat ko sa niaging pangagamhanan ning dakbayan kay ang kalamboan sa JR Borja karon maoy bunga sa ilang paningkamot ug paninguha. Gisunod lang ni nato, ug ipadayon nato,” saysay ni Mayor Klarex.
Matud sa mayor laraw pa niining dugangan ang kasamtangang 27 units sa hemodialysis, lakip airconditioning units alang sa kaarangan sa pamati sa mga modangop niini.
Gipasalig usab sa mayor ang iyang suporta sa JRBGH ug mga kalamboan niini sanglit giisip ni Mayor Klarex nga kauban niya ang tanan sa pag-alagad sa katawhan. (ACM/Photos by ROD CONSTANTINO/CIO)
