DAKONG garbo na usab sa Cagayan de Oro ubos sa administrasyon ni Mayor Rolando “Klarex” Uy ang pagbaton sa dili madugay og ‘state-of-the-art’ Disaster Resilience Complex human gipahigayon ang groundbreaking ceremony sa proyekto adlaw’ng Biyernes, Septiyembre 30 ning tuiga.

 

 

Ang tukoron nga 1.8 hectare complex nahimutang sa Zone 8, Brgy Carmen ug maoy bag-ong buhatan sa City Disaster Risk Reduction and Management Department sa pagpangulo ni Officer-In-Charge Nick Jabagat.

 

Matud ni Jabagat, phase 1 sa maong complex mao ang CDRRMD Operation Center maoy unang tukoron diin naglakip niini ang weather monitoring, conference room, employees’ quarters ug parking bay.

Aduna usab kini ipahimutang nga mga solar panels sa roof deck.

 

Sa mensahe ni Mayor Klarex iyang gikalipay nga makabaton na gyud og permanenteng buhatan ang CDRRMD nga usa sa iyang mga gipangandoy sa iyang pamunoan.

 

Gipasalig sa mayor nga anaa ang iyang suporta sa CDRRMD ug gidasig niini ang mga empleyado nga magmakanunayon sa ilang kinasing-kasing nga pagserbisyo sa katawhan ning dakbayan.

 

 

Ang katukoran sa Disaster Resilience Complex nahimong posible usab sa paningkamot sa administrasyon ni kanhi Mayor Oscar Moreno ug kanhi overseer nga si retired Col. Mario Verner Monsanto.

Lakip sa misaksi sa groundbreaking ceremony ang Office of Civil Defense, Bureau of Fire Protection, ug daghan pa. (ACM/Photos by ROD CONSTANTINO/CIO/CDRRMD)