Wednesday, 26 October 2022 03:49

APOO NAGTINGUHA MAHIMONG AGRI-TECHNO HUB; GISELEBRAR ANG IKA-61 KA TUIG NGA ANIBERSARYO

Written by
Giselebrar sa Agricultural Productivity Operations Office kon APOO ubos ni City Agriculturist Paterno L. Gonzales ang ika-61 ka tuig nga anibersaryo sa ilang buhatan kagahapong adlawa, Oktubre 23, 2022.
 
Gisugdan ang selebrasyon pinaagi sa thanksgiving mass ug gisundan kini sa usa ka simpleng programa agi’g pahinungod sa mga empleyado ngadto sa ilang mga partners nga gitambongan mismo ni Mayor Rolando “Klarex” Uy.
 
Mihatag ang mayor sa iyang mensahe pasalamat sa tanang mga opisyal ug kawani sa maong opisina sa padayon nga pag-alagad sa katawhan, ilabina sa pagsulbad sa mga problema ug hisgutanan kalabot sa agrikultura.
Dugang pa ni Mayor Klarex nga siento porsiyento ang iyang suporta sa APOO ug abli kanunay ang iyang buhatan kung ugaling adunay gustong ipaabot ang maong departamento.
 
Miduyog sa maong selebrasyon si City Councilor Jay Roa Pascual, ang Chairman sa Committee on Agriculture; Mr. Edwin Dael, APOO Consultant; Ms. Sheila Lumbatan, Chief of Staff ni Mayor Klarex; ingon man si Pastor Dimver Andales, CSWD Overseer; ug Dr. Ferdie Miranda, JRBGH Overseer.
 
Subay sa panglantaw sa maong buhatan, tinguha sa APOO nga mamahimong leading hub sa ‘agri-technology and innovation’ pinaagi sa pagtanyag og mga serbisyo nga mapahimuslan sa katawhan sa dakbayan, ilabina alang sa kaarangan sa kinabuhi sa mga mag-uuma ug mangingisda. (AMTB/Photos by APOO)