ANDAM na ang mga personahe sa City Local Environment and Natural Resources Office (CLENRO) ingon man mga barangay officials ug tigdumala sa private cemeteries alang sa paghandum sa All Saints and All Souls Day karong Nobyembre 1 ug 2.

 

Gilaumang modagsa sa mga sementeryo ang liboan ka mga katawhan nga mobisita sa ilang mga minahal sa kinabuhi nga mipanaw na human sa duha ka tuig nga sirado kini tungod sa pandemya.

 

Mismo si Mayor Rolando “Klarex” Uy ang mipagula og kamandoan ug nakigtagbo sa mga hingtungdan nga mga buhatan sa city hall, barangay ug private cemeteries adlaw’ng Martes aron masiguro ang luwas nga kasaulogan.

 

Lakip sa panawagan sa mayor ngadto sa publiko ang kanunay pagsubay sa minimum public health standards samtang anaa palibot sa mga sementeryo.

 

Lakip usab sa kamandoan ni Mayor Klarex ang pagdili sa mga backpacks, mga sound system, mahait nga hinagiban ug uban pa.

 

Samtang gipasalig usab sa mga namuno sa City Memorial Park o kanhi Bolonsiri cemetery ang paghatag og libre’ng sakay palibot sa sementeryo ilabina sa mga senior citizens, mga mabdos ug mga kabataan.

 

Subli usab gihangyo sa City Health Office ang katawhan nga adunay mga balatian sa pagpabilin na lamang sa ilang panimalay ug maghalad na lamang sa ilang pag-ampo alang sa ilang mga mahal sa kinabuhi nga mipanaw na. (ACM/Photos by ROD CONSTANTINO/CIO)