Gihangyo ni Mayor Rolando `Klarex’ Uy ang mga punong barangay sa 80 ka barangay nga bantayan ug i-monitor ang mga grupo ug panag-tapok sa mga batan-on partikular na ang presensya sa mga gang sa ilang barangay.

 

Matud ni Mayor Klarex kinahanglan masumpo ug mabungkag ang bisan unsa nga gang sa mga batan-on sa dili pa makahimo og mga kagubot ug nagkadaiyang krimen susama sa nahitabo niadtong adlaw’ng Domingo nga panag-engkuwentro sa duha ka gang nga miresulta sa pagdunggab patay sa usa ka 14-anyos.

 

Dugang pa sa mayor nga ipatawag ang mga ginikanan sa mga batan-on nga nalambigit sa gang aron istoryahon diin siya mismo ang makigsulti sa mga ginikanan.

 

Samtang giaghat usab ni Mayor Klarex ang mga ginikanan ilabina kadtong adunay mga anak nga menor de edad nga atimanon, bantayan ug i-monitor ang kalihokan sa ilang mga anak aron dili kini malambigit sa dautan nga mga binuhatan ug dili mahitumpawak sa kadautan.

 

Naglaum si Mayor Klarex nga dili na masubli ang maong panghitabo ilabina kung anaa ang mga punong barangay nga mag-monitor sa ilang tagsa-tagsa ka barangay. (ALR/CIO/Photos by Rod Constantino/CIO)