Dugang 34 ka lote sa BLISS, Macanhan Relocation Project (MRP) Barangay Carmen ang napailawom sa geotagging nga gihimo sa mga personahi sa Land Asset Management Office-Task Force for the Emancipation of Piso-piso Beneficiaries (LAMO-TFEPB) ug CENRO-Initao.

 

Si Engr. Armen Cuenca, Executive Director sa TFEPB, mipasabot nga dako og tabang ang geotagging sa katawhan aron masayran ug matultulan ang lokasyon ug mga kasayuran sa maong lugar.

Nasayran nga ang geotagging usa ka proseso nga magbutang og dugang mga geographical information sa nagkadaiyang pamaagi sama sa digital photograph, video ug uban pa.

 

Gani, sa paglingkod ni Mayor Rolando `Klarex’ Uy mokabat na sa 24 ka titulo sa yuta ang gitunol ngadto sa mga benepisyaryo sa MRP BLISS human nagpatabang sa syudad aron ilang maangkon ang maong titulo nga sa dugay’ng panahon ilang gipangandoy human ang maong proyekto nabiyaan sa nasyonal nga ahensya ubos sa pagdumala sa kanhi unang ginang Imelda Marcos.

 

Una nang gipadayag ni Mayor Klarex Uy nga usa ang housing project sa iyang mga priority ubos sa RISE CDO Development Agenda sa tinguha nga mahatagan og desenting pinuy-anan ang mga informal settler families (ISFs) sa syudad. (ALR/CIO/Photos from LAMO/TFEPB)