MISAKA ngadto sa 135% ang kaso sa dengue ning syudad basi sa report sa City Health Office sa nilabay’ng mga adlaw.

 

 

Matud ni City Epidemiologist Dr Teodulfo Joselito Retuya Jr., mitala og 1,282 ka kaso sa dengue ang Cagayan de Oro sugod Enero 1 hangtud Oktubre 22 ning tuig, kung itandi sa 583 lamang sa susamang mga bulan sa 2021.

 

Apan bisan pa man niini, malaumon ang City Health Office nga mapugngan na ang pagsaka sa ihap sa dengue cases human sa mga pamaagi ug strategies nga gilusad sa ilang buhatan uban usab ni Mayor Rolando “Klarex” Uy diha sa public awareness ug education campaign sa matag barangay.

 

 

Basi sa report, nag-una ang Brgy Carmen sa adunay pinakataas nga ihap sa dengue cases ug gisundan kini sa barangay Balulang, Lumbia, Patag, Kauswagan, Lapasan, Bulua, Canitoan, Bugo ug Camaman-an.

Gipasabot ni Dr Retuya nga kining mga barangay pulos mga dagko ug adunay pinakadaghan nga mga molupyo sa Cagayan de Oro.

 

Subay niini, naghangyo ang City Health Office, sa pagpangulo ni Dr. Rachel Dilla, sa katawhan sa pagmintinar sa kahinlo sa ilang dapit, ilabina ang mga posibleng puy-anan ug itlogan sa mga lamok aron malikay sa sakit nga dengue. (ACM/CIO)