Thursday, 03 November 2022 00:39

‘BAHAY TULUGAN’ SA MGA INDIGENOUS PEOPLES TUKORON SA BRGY DANSOLIHON

Written by
USA ka ritwal ang gipahigayon, Oktubre 28 sa atong mga kaigsoonan sa Indigenous Peoples sector diha sa Sitio Canaan, barangay Dansolihon ning siyudad.
 
Ang maong ritwal gidumala ni Baylan Sumagayan Benie Malinda uban sa iyang mga kauban alang sa pagsugod sa pagtukod sa 'Bahay Tulugan' alang sa Indigenous Peoples (IPs) sector, diin kini gitambongan sa mga IP leaders sa nagkadaiyang barangay ug City Social Welfare and Development Department (CSWD) IPs Section Focal Person Nena Lumandong ug mga personahe sa maong buhatan.
 
Ang project 'Bahay Tulugan' gihangyo sa City Tribal Council sa 17 ka barangay nga gilangkoban sa barangay Tablon, FS Catanico, Cugman, Balubal, Besigan, Tignapoloan, Dansolihon, Mambuaya, Bayanga, Lumbia, Pagalungan, Tagpangi, Taglimao, Tuburan , Pigsag-an, Tumpagon ug San Simon niadtong tuig 2019.
 
May be an image of 8 people, people standing and outdoors
 
Kini magsilbing lugar diin asa ipahigayon ang mga katiguman ug IP-related activities sama sa tribal wedding, Kaamulan, general assembly, handicraft making, mat weaving, ug kon adunay conflict dinhi gihapon kini i-settle.
Mahimo usab kining venue alang sa mga batan-on nga magtuon sa aspeto sa 'culture and traditions' nga itudlo sa mga tribal experts.
 
Makabenepisyo sa 'Bahay Tulugan' ang tanang Higaonon sa Cagayan de Oro nga kauban sa 17 ka barangay uban ang ilang mga IP leaders.
Moduol lang sa ilang Limbobongan kon Tribal Head sa matag community o barangay aron makapa-schedule sa paggamit niini.
 
Ang proyekto hugot nga gisuportahan ni Mayor Klarex Uy pinaagi sa City Engineer's Office nga gipangulohan ni Engr. Sam Arojo uban sa Amlag Builders Construction Supplies Corp kinsa mao'y nagsilbing contractor sa maong proyekto. (NLB/CIO/photos courtesy of CSWD).