Mapasigarbohon ang mga kadagkuan ug sakop sa City Anti-Drug Abuse Council (CADAC) human kini giila nga Highly “Ideal” Functional Anti-Drug Abuse Council sa tuig 2021 pinaagi sa rehiyonal nga buhatan sa Department of Interior and Local Government (DILG-10) atol sa ADAC Performance Audit nga gipahigayon niadtong bulan sa Abril-Hunyo 2022.

 

 

Gipasabot ni City Councilor Romeo Calizo, co-chairman sa CADAC, nga ang assessment gi-basi sa tulo ka criteria ug kini mao ang: BADAC Functionality, Drug Clearing, ug Reduction of Drug Affection.

 

Dumduman nga sa administrasyon ni kanhi Mayor Oscar Moreno hugot ang iyang paningkamot nga mapatuman ang mga programa sa CADAC uban ni Kag. Calizo pinaagi usab sa Oro Citizen’s Wellness Development Center (OCWDC) nga gipangulohan ni Dr. Rhyselle Descallar, uban sa suporta ni kanhi 1st District Congressman ug karon Mayor Rolando `Klarex’ Uy.

 

Samtang, gipadayag ni Kag. Calizo nga kini nga pag-ila mas nakapainit sa ilang misyon batok drug abuse ug addiction diha sa pagpaningkamot nga makab-ot ang drug-resistant city.

 

Sa Rehiyon 10, lakip sa giila ang lima ka mga probinsya uban ang ilang mga municipalities ug barangays nga mipailawom sa intensive assessment sa ilang ADAC functionality.

Nasayran nga ang nanganlan nga mga highly functional LGUs eligible alang sa 2021 ADAC National Awarding Assessment. (ALR/CIO/file photos)