Gihisgutan sa mga kadagkuan sa Department of Agriculture (DA) pinaagi ni DA Undersecretary Joel Rudinas, ug DA Regional Director Carlene Collado uban ni Mayor Rolando `Klarex’ Uy ang programa sa ahensya nga makatabang sa subling pagbangon sa local swine industry sa Cagayan de Oro bag-ohay lang.

 

Gikabutyag nga ang DA Regional Field Office (DA RFO-10) gikatakdang mopatuman sa Integrated National Swine Production Initiatives for Recovery and Expansion (INSPIRE) Program sunod tuig.

Matud ni Dir. Collado nga tumong sa programa nga mapatas-an ang kapasidad sa local swine industry aron makahatag og igong supply sa baboy ug karne.

 

Ang programa mobalor sa P10-milyones diin nakatutok kini sa package interventions aron masugdan ang swine inventory ug breeder base, lakip ang pagpatuman sa mga plano sa biosecurity nga nakaangkla sa mga Programa sa BABay ASF isip suporta sa mga paningkamot alang sa repopulation sa swine industry.

 

Ang INSPIRE Community-Based Clustering Project naglangkob sa upat ka components ug kini mao ang; Biosecured Swine Fattening Facility, piglets, bags of hog grower, ug nagkalain-laing drugs ug biologics.

Matud sa DA, sa higayon nga moapil ang syudad sa implementasyon sa programa, moagi kini sa proseso sa swine repopulation ug biosecurity training alang sa farm compartments.

 

Ang syudad magsilbi usab nga multiplier nga mogama og dekalidad nga genetic materials nga iapod-apod ngadto sa mga kwalipikado nga FCA/recipients aron makatampo sa supply sa baboy ug karneng baboy sa lokalidad.

 

Kini nga kalambuan ang gikalipay ni Mayor Klarex diin iyang gipasalamatan ang mga kadagkuan sa DA sa pagkonsiderar sa Cagayan de Oro nga makaapil sa maong programa aron matabangan ang mga backyard hog raisers nga makabangon ilabina kadtong naapektuhan sa African Swine Fever (ASF).

 

.Mipadayag usab sa iyang suporta si City Councilor Jay Roa Pascual, chairman sa committee on agriculture ug naglaum nga pinaagi niini makabangon ang local swine industry sa syudad. (ALR/CIO/Photos from CMO)