Giaghat ni Mayor Klarex Uy ang mga molupyo sa barangay Tumpagon ug kasikbit nga mga lugar nga pahimuslan ang mga batakang serbisyo sa city hall nga itanyag karong Sabado, Nobyembre 5 atol sa ‘Klarex nga Serbisyo sa Baryo’ outreach program.

 

Tipik sa mga serbisyo nga itunol sa nagkadaiyang buhatan ug opisina sa city hall ang libreng check-up ug tambal, ibot sa ngipon, rehistro sa kabataan, pagpamakuna sa mga hayop, binhi sa prutas ug utanon, Covid-19 vaccination, paglukat sa cedula, aplikasyon sa business ug building permit, ug daghan pang uban.

 

Maghatag usab sa kahugyaw ug kalingawan sa publiko ang ‘Kasalan ng Bayan’ diin si Mayor Klarex mismo ang mangulo sa seremonyas sa kasal alang niadtong mga magtiayon nga nagpuyo-puyo na sulod sa pila ka katuigan.

 

Isip pahalipay gikan sa mayor, makadawat ang kada paresan og tag-usa ka letchon, cake ug wine, gawas usab sa regalo nga ihatag ni Liga ng mga Barangay President Kagawad Yan Lam ‘Alam’ Lim aron adunay gamay’ng salo-salo ang mga bag-ong kinasal ini’g pag-uli sa ilang tagsa-tagsa ka balay. (CIO)