Monday, 07 November 2022 07:28

KLAREX: ‘YEAR-END BONUS SA MGA REGULAR, CASUAL MADAWAT NA SUNOD SEMANA’

Written by
NAHUGYAW ug gikalipay sa mga empleyado sa City Hall ang gianunsyo ni Mayor Rolando “Klarex” Uy atol sa pagpakayab sa nasudnong bandila Lunes sa buntag nga ihatag na ang gikahinaman nga year-end bonus sugod sunod semana.
 
Matud pa ni Mayor Klarex madawat sa mga city officials, regular ug casual employees ang usa ka bulan nga sweldo isip Year-End Bonus o’ 14th Month Bonus, ug gipasalig niini nga sugdan ang pag-release karong sunod semana.
 
Dugtong pa niini, gibutyag ni Mayor Klarex nga makadawat pa usab ang mga regular ug casual nga kawani sa city hall sa laing pang pahalipay nga mao ang 15th Month Bonus sa dili pa ang kasaulogan sa Pasko sunod bulan.
 
Gipasalig usab ni Mayor Klarex nga magmalipayon pa gihapon ang mga empleyado sa pagsugat sa bag-ong tuig sanglit dugang P10 mil pa gayud ang madawat sa regular ug casual employees human sa Pasko.
 
Dugang pa sa mayor, lakip Job Order employees ug consultants ang makadawat usab og tag P15 mil matag usa karong Disyembre isip pahalipay sa ilang pag-serbisyo sa katawhan ning syudad.
 
Tungod niini, dako ang kalipay ug pasalamat sa mga empleyado sa City Hall ngadto sa mayor tungod sa mga grasya nga dawaton sugod karong bulana.
 
Apan gipasabot usab ni Mayor Klarex nga dili siya magpanuko pagtangtang sa mga empleyado human sa kapaskohan kung wala kini nagtuman sa ilang mga tahas ug gimbuhaton sa paghatag og serbisyo bisan pa man og sakit alang kaniya ang maong desisyon. (ACM/Photos by ROD CONSTANTINO/CIO)