HINIUSANG gisaulog sa LGU-CDO ang National Children's Month uban sa temang, "Kalusugan, Kaisipan, at Kapakanan ng Bawat Bata Ating Tutukan", lakip ang 11th Juvenile Justice and Welfare Consciousness Week ug 18-Day Campaign to End Violence Against Women, Nobyembre 4.
Kini gipangulohan sa City Social Welfare and Development Department, uban sa pag-abag sa Department of Social Welfare and Development X, Regional Council for the Welfare of Children X, ug Regional Juvenile Justice and Welfare Committee.
Ang kasaulogan gisugdan sa usa ka motorkada ug gisundan sa hamubo nga programa nga gipahigayon diha sa Amphitheatre, diin adunay mga padula ug pahalipay alang sa mga bata nga gitanyag ug gipaluyohan sa Smart Communications.
Sa iyang mensahe, si City Councilor Girlie Balaba, kinsa maoy chairperson sa Committee on Social Services ug Co-chairperson sa City Council for the Protection of Children (CCPC) ning siyudad, nagkanayon: "Akong buot ipadayag kaninyo ang kinatibuk-ang pagsuporta sa atong halangdong Mayor Klarex Uy sa mga programa sa atong pangagamhanan ilabina gayud ang mga programang may kalabotan sa atong kabatan-onan, ang paghatag og dakong bili sa ilang katungod ug paghatud sa mga serbisyo alang sa ilang mga panginahanglanon aron sila mabuhi ug modako nga malipayon ug mahimong aktibong miyembro sa komunidad.”
Mihatag usab sa ilang mga mensahe sila si DSWD X Regional Director Ramel F. Jamen, City Councilor Imee Moreno, CCPC Vice Chairperson Jonah A. Domingo, samtang nag-virtual message usab si Council for the Welfare of Children Executive Director V Usec Angelo M. Tapales.
Ang kalihokan gisalmotan sa CCPC, 20 ka barangay nga gilangkoban sa Barangay Council for the Protection of Children, lakip mga ginikanan ug bata. (NLB/CIO/Photos by Reynan Baylin/CIO)