Sa tinguha nga mas mapalig-on ug magmalampuson ang mga programa sa City Anti-Drug Abuse Council (CADAC), hingusgan niini nga hingpit na nga magamit ug maglihok ang Barangay Anti-Drug Abuse Council (BADAC) sa 80 ka barangay dinhi sa syudad, matud ni City Councilor Romeo Calizo.

 

 

Gipasabot ni Konsehal Calizo, kinsa co-chairman sa CADAC, nga mas epektibo ang kampanya sa syudad batok gidiling druga kung ‘functional’ ang BADAC sa kabarangayan, ilabina nga anaa sa BADAC ang `spirit of volunteerism’ ilabina nga sila ang mas nakaila sa ilang katawhan.

 

“The problem is kulang sa budget ang barangay para sa BADAC,” dugang ni Konsehal Calizo atol sa pagbukas sa kasaulogan sa Drug Abuse Prevention & Control (DAPC) month.

Siya namahayag nga gikinahanglan nga adunay budget ang BADAC kay sila ang mas nasayod unsaon nga mapugngan ang pagkuyanap sa gidiling druga sa ilang barangay.

 

Nasayran usab nga adunay kakulangon sa kahibalo ang mga barangay sa paghimo og budget plan alang sa programa sa BADAC. Gani, maihap lang ang barangay nga nakahatag sa ilang budget plan sa BADAC.

 

Nunot niini, laraw ni Konsehal Calizo nga magpasiugda og training/seminar uban sa tabang sa Department of Interior and Local Government (DILG) aron matudloan ang BADAC sa ilang budget plan. (ALR/CIO/Photos by Rod Constantino/CIO)