MILINGKOD sugod kagahapong adlawa isip youth city officials ang 30 ka mga student-leaders gikan sa pribado ug pampublikong tunghaan sa syudad alayon sa usa ka semana nga youth exposure program sa Rotary Club of Cagayan de Oro.

 

Kini human nanumpa sa ilang katungdanan atubangan kang Mayor Klarex Uy ang mga Rotary youth city officials alayon sa Rotary Youth Week atol sa pagpakayab sa nasudnong bandila, Nobyembre 7, diha sa City Hall Quadrangle, ning siyudad.

 

Human sa ilang pagpanumpa, tagsa-tagsa silang gihatud sa matag opisina sa city hall aron personal nga masinati ug maobserbahan ang pagpadagan ug pagtunol sa mga batakang serbisyo sa syudad.

 

Misalmot usab ang mga student-leaders sa regular session sa 20th City Council nga gidumala ni Vice Mayor Bebot Rodriguez kagahapong adlawa.

 

Huptan sa mga Rotary youth city officials ang papel isip mayor, bise mayor, mga konsehal sa syudad ug mga department managers sulod sa usa ka semana nga exposure program.

 

Napili si Noriel John L. Llamos gikan sa Lumbia National High School isip youth city mayor, samtang si Jennica Yvonne S. Lago gikan sa Bayabas National High School ang magsilbing youth city vice mayor.

 

Sila gipili pinaagi sa eleksyon niadtong Nobyembre 4 diha sa Philtown Oriental Garden Restaurant diin mipailawum sila sa training kalabot sa mental health ug fighting misinformation, ang tema sa Rotary Youth Week.

 

Ang Rotary Youth Week tinuig nga proyekto sa Rotary Club of Cagayan de Oro, kaabag ang kagamhanan sa syudad pinaagi sa Oro Youth Development Office, Sangguniang Kabataan Federation Office, Department of Education ug City Council for the Protection of Children. (NLB/CIO/photos by Rod Constantino/CIO)