MALIPAYONG gipahibalo ni Mayor Rolando ‘Klarex’ Uy nga ipahigayon karong Disyembre 10 sa barangay Gusa ang ‘Klarex nga Serbisyo sa Baryo’.

 

Kini ang gipadayag sa mayor atol sa iyang pagtambong sa flag raising ceremony sa barangay Gusa kauban ang katawhan ug opisyales sa Gusa pinangulohan ni Kapitan Marlo L. Tabac, Nobyembre 8 ning tuig sa Gusa covered court.

 

Dumduman ang Gusa ang ikapito nga barangay nga giadtoan sa mayor aron personal nga motambong sa flag raising ug makahinabi ang katawhan ug opisyales sa barangay.

 

Dako usab ang pasalamat ni Kapitan Tabac kang Mayor Klarex sa pagtubag niini sa hangyo nga mapahigayon ang KSB sa Disyembre 10, diin mokabat na sa 156 ka mga parisan ang inisyal nga nagpalista alang sa ‘Kasalang Bayan’.

 

Samtang, mokabat usab sa 500 ka mga ‘food packs’ ang gi-andam sa City Social Welfare and Development aron i-apod-apod sa target beneficiaries sa barangay Gusa.

 

Mapasalamaton usab si Kapitan Tabac nga adunay ‘extension office’ sa CSWD ang gipahimutang sa Gusa kung asa mahimong adtuan sa katawhan dili lang sa taga-Gusa apan lakip na ang mga kasikbit nga barangay.

 

Ang pagpahigayon sa ‘Klarex nga Serbisyo sa Baryo’ ug pagtambong sa flag raising sa mga barangay pipila lang sa mga kalihukan ni Mayor Klarex aron masiguro nga maalagaran ang katawhan ubos sa prinsipyo nga ‘ang katawhan duol sa gobyerno ug ang gobyerno duol sa katawhan’.

 

Human sa flag raising, gipahigayon usab sa Community Improvement Division ug City Civil Registry ang ‘pre-marriage orientation & counseling’ alang sa mga mosalmot sa ‘Kasalan ng Bayan’. (AGP/Photo by Jay Arancon/CIO)