Subling gihangyo ni Mayor Rolando “Klarex” Uy ang katawhan sa syudad ilabina kadtong wala pa mabakunahi ug wala pa makapa-booster sa pagpahimulos sa libreng bakuna aron malikay sa moderate to severe symptoms sa COVID 19 kung ugaling mataptan kini.

 

Basi sa datos sa City Health Office (CHO), dako nga porsiyento sa mga nataptan sa COVID 19 mga local index o mga molupyo ning syudad nga adunay pagbiyahe gawas sa syudad ug authorized persons outside of residence (APOR) nga nagtrabaho sa nagkalain-laing hospitals sa Cagayan de Oro.

 

Lakip sa mga natala mga re-infection sa COVID 19 nga nakasinati lamang sa mild symptoms ug ang uban niini asymptomatic cases.

 

 

Matud ni City Health Officer Dr Rachel Dilla, anaa sa 16 cases per day ang average nga natala sa syudad sugod Oktubre 15 ug gikabalak-an sa ilang buhatan nga magpabilin kini nga sitwasyon ilabina nga duol na ang kasaulogan sa Pasko. (ACM/CIO)