Monday, 14 November 2022 06:42

CONDONATION SA TRAFFIC VIOLATIONS APROBADO NA

Written by
Makapahimulos na sa condonation o’ pagpasaylo ang mga drayber nga adunay mga kalapasan sa balaod trapiko human gi-aprobahan sa Konseho ang City Ordinance No. 14385-2022 atol sa regular session niadtong Nob. 10, 2022.
 
Ang paghatag ning maong kahupayan giduso ni Mayor Rolando `Klarex’ Uy ngadto sa 20th City Council pinangulohan ni Vice Mayor Jocelyn Rodriguez aron matabangan ang mga drayber nga makasugod sa ilang panginabuhi nga walay huna-hunaon nga bayronon sa ilang mga traffic violations, ilabina nga apektado ang tanan sa pandemya.
 
Basi sa ordinansa, kadtong mga drivers nga na-isyuhan og Traffic Citation Tickets gikan sa tuig 2021 ug sa niagi pang mga katuigan mapasaylo ug mawala ang mga traffic violations nga walay bayaran.
Ang una nilang buhaton mao ang pagkuha og Certificate of Availment gikan sa Mayor’s Office.
 
Ug kung aduna silay traffic violation karon nga tuig, kinahanglan bayaran nila ang kinatibuk-ang kantidad aron makapahimulos ning maong condonation.
Ang certificate mao usab ang basihan sa City Treasurer’s Office aron dawaton ang bayad sa 2022 nga traffic violation.
 
Dugang pa, ang pagkuha og Certificate of Availment sulod lamang sa tulo ka bulan human na-aprobahan ang ordinansa, ug dili usab molapas sa lima ka bulan ang pagbayad sa 2022 traffic violation human na-aprobahan kini nga ordinansa.
 
Si Engr. Nonito Oclarit, Dep’t Manager sa Roads and Traffic Administration (RTA), namahayag nga moadto lang sa ilang buhatan ang mga drivers dala ang ilang valid ID ug driver’s license, ingon man ang certificate aron matabangan sa condonation program sa syudad. (ALR/CIO/Photos from RTA))