NAG-UNA ang Barangay Lumbia sa adunay pinakadaghan nga COVID 19 cases sa Cagayan de Oro gikan Nobyembre 7 hangtud 13 ning tuig.

 

Matud ni City Epidemiologist Dr. Teodulfo Joselito Retuya Jr. sa City Health Office, 17 sa kinatibuk-ang 118 active cases gikan maong barangay, ug gisundan kini sa Brgy Carmen nga adunay 11 ug Brgy Macasandig ug Balulang nga adunay tag 8 ka kaso.

 

 

Samtang mitala usab og 7 ka kaso ang Brgy Puntod ug tag 6 ka mga kaso ang Brgy Nazareth, Patag ug Bugo.

 

 

Dugang ni Dr. Retuya, kini nga mga barangay lakip sa mga dagko ug daghan og populasyon ug nag-una usab sa hinungdan sa pagsaka ang pagbiyahe sa mga residente gawas sa Cagayan de Oro sanglit gibuksan ug luag na ang gabayan sa pagbiyahe.

 

Nagpahinumdom usab ang maong opisyal sa pagsunod sa minimum public health standards ilabina sa mga “super spreader events” sama sa bag-o lang gihandum nga All Saints, All Souls Day ug ang umaabot nga kapaskohan.

 

Subay niini, naghangyo si Mayor Rlando “Klarex” Uy sa katawhan pinaagi sa City Health Office nga kanunay magmabinantayon ug magpabakuna lakip booster shot aron malikay nga mataptan sa COVID 19. (ACM/CIO)