Mahupay na ang kabug-at sa balayronon sa mga delinquent stallholders sa renta sa ilang stalls sa kamerkaduhan ning syudad human gi-aprobahan ang ordinansa nga naghatag og 30 porsiyento nga condonation alang sa tuig 2020-2021.

Basi sa City Ordinance No. 14385-2022, hatagan og 30 porsiyento nga condonation sa ilang renta matag tuig ang mga delinquent stallholders.

 

Kadtong mga stallholders nga dili delingkwente makapahimulos gihapon sa 30 porsiyento nga condonation pinaagi sa tax credits alang sa tuig 2022 ug 2023.

 

Ang mga pamaagi sa pagpahimulos sa condonation mao nga magkuha una og Certificate of Delinquency gikan sa City Finance Department o kaha sa City Economic Enterprises Department (CEED), diin nakabutang ang pangalan sa stallholder, ang nahimutangan sa stall, stall number (kung applicable), ug ang printed copy sa assessment.

 

Magkuha usab og Certificate of Availment gikan sa Mayor’s Office ang aplikante sa condonation ug mao kini ang i-presentar sa ilang pagbayad diha sa City Treasurer’s Office uban ang Certificate of Delinquency.

 

Nagpahinumdum ang syudad nga dili transferable ang Certificate of Availment, ug kung dili mabayaran sa stallholders sulod sa lima ka bulan ang iyang delingkwente nga abang sa stall, mahimo na usab nga due ug demandable ang outstanding interest ug surcharge.

 

Samtang, gipadayag ni Marfe Dacoco, dep’t manager sa CEED, nga anaa kanunay ang ilang mga personahi nga mo-assist sa mga stallholders nga mo-avail sa maong condonation alang usab sa dugang kasayuran ug pagpasabot. (ALR/CIO/Photos from CEED)