MALIPAYONG gipahibalo ni Mayor Rolando ‘Klarex’ Uy nga ipahigayon karong adlaw'ng Sabado, Nobyembre 19 sa barangay FS Catanico ang ‘Klarex nga Serbisyo sa Baryo’, usa ka one-stop shop outreach program sa syudad.

Nunot niini, giaghat sa mayor ang mga katawhan sa maong barangay ug kasikbit nga mga dapit nga pahimuslan ang mga batakang serbisyo nga libreng itanyag sa nagkadaiyang opisina ug departamento sa city hall.

 

Kini naglakip na sa paghiling sa mga balatian ug libreng mga tambal, ibot sa ngipon, check up sa mata, pag-apod-apod og mga binhi sa prutas ug kahoy, pagpamakuna sa mga hayop ug COVID-19, pagrehistro sa mga bag-ong natawo, feeding, pagdawat og aplikasyon sa business ug building permit ug daghan pang uban.

 

 

Sentro sa kalihukan ang ‘Kasalan ng Bayan’ diin kaslon ni Mayor Klarex kadtong mga magtiayon nga nag-ipon-ipon na apan wala makasal tungod sa kawad-on ug kapobrehon. (CIO)