Gihingusgan sa mga personahi sa City Economic Enterprises Department (CEED), ug Roads and Traffic Administration (RTA) ang padayon nga pag-profile sa mga ambulant vendors gikan sa mga dalan Osmeña-Ramonal ug Guillermo atubangan sa Hotel Conchita.

 

Sa inisyal nga taho sa CEED, mokabat na sa 1,160 ka ambulant vendors ang ilang na-profile nga anaa nag-display sa ilang baligya sa dalan JR Borja, Capt. Vicente Roa, Yacapin, ug Daomar.

 

Gipasabot ni CEED Dep’t Manager Marfe Dacoco nga mga ‘actual ambulant vendors’ lamang ang ilang gi-profile ug gi-evaluate uban sa mga personahi sa RTA nga mao usab ang documentor o magkuha og hulagway.

Uban usab sa ilang paglibot ang kapulisan sa Police Station 2 ug security guards sa CEED alang sa seguridad.

 

Tumong sa profiling nga mahibaw-an ang gidaghanon sa mga ambulant vendors nga actual nga namaligya atol sa day time ug night time alang sa sectioning ug pagbalhin kanila sa laing mga lugar aron dili sila makabalda sa dagan sa trapiko.

 

 

Una nang gipadayag ni Mayor Rolando `Klarex’ Uy nga dili na niya itugot nga adunay ambulant vendors diha sa dalan JR. Borja ug sa mga dalan nga maoy naandan nga agian sa mga public utility vehicles (PUVs) ug pribadong sakyanan.

 

Mipagawas niini nga desisyon si Mayor Klarex human iyang nakita nga wala naminaw sa iyang hangyo ang mga ambulant vendors nga dili mag-abusar ug dili mosupak sa balaod ingon man walay maperhuwesyo diha sa ilang pagpamaligya.

Hinuon, gihatagan gihapon sa mayor og kahigayonan ang mga ambulant vendors nga makapanginabuhi pinaagi sa pagbalhin kanila og laing lugar.

 

Basi sa iyang kamandoan, sugdan sunod semana ang pagbalhin sa mga sidewalk vendors sa bag-ong puwesto aron hapsay ug haruhay ang ilang pagpamaligya. (ALR/CIO/Photos from CEED)