Friday, 18 November 2022 07:56

ROAD CLEARING OPERATIONS SA SYUDAD WALA NAUNDANG

Written by
Laing hugna sa road clearing operations ang gipahigayon sa composite team sa syudad ubos sa administrasyon ni Mayor Rolando `Klarex' Uy diha sa Barangay Cugman adlaw’ng Huwebes, Nobyembre 17, 2022, partikular na sa usa ka talipapa diin adunay mga illegal structures nga gitukod.
 
Ubay-ubay ka mga illegal structures ang gipangguba sa composite team kay niabot na kini sa dalan nga wala gitugot hinungdan nga maglisod na usab og agi ang mga sakyanan ug mga mamalitay.
 
Gipasabot sa composite team nga wala naundang ang road clearing operations apan gitahasan ang mga punong barangay nga sila na ang magpatuman niini sa ilang kabarangayan apan andam motabang ang composite team ilabina kon nagkinahanglan sila og heavy equipment.
 
Gani, bisan panahon sa pandemic, kanunay sila pangayoan sa DILG og accomplishment sa road clearing.
 
Ang composite team gilangkuban sa City Administrator’s Office, City Legal, City Disaster Risk Reduction Department (CDRRMD), Roads and Traffic Administration (RTA), Cagayan de Oro City Police Office (Cocpo), Office of the Building Official (OBO), City Engineering Office, Department of Public Works and Highways (DPWH-10), opisyales sa barangay Cugman ug mga barangay tanod.
 
Ang road clearing subay sa DILG Memorandum Circular 2019-121 ug alayon usab sa kamandoan ni kanhi Pres. Rodrigo Duterte nga limpiyohan ang kadalanan ug sidewalk sa mga illegal structures ug obstructions. (ALR/CIO/Photos by Reynan Baylin/CIO)