Sa iyang pagpatuman sa balaod aron mahatagan og kaangayan ang katawhan, mapaubsanon nga gihangyo ni Mayor Rolando `Klarex’ Uy ang mga ambulant ug sidewalk vendors nga sabton ug dili ikahiubos ang iyang desisyon nga pagbalhin kanila.

 

“Mangayo ko sa pasaylo ug pagsabot bisan wala ko’y sala kaninyo,” pamahayag ni Mayor Klarex atol sa orientation ug raffling sa puwesto sa mga ambulant ug sidewalk vendors nga gikan sa dry good section ug food condiments.

Gipasabot ni Mayor Klarex ngadto sa mga vendors nga tungod sa ilang pag-abusar ug wala pagpaminaw sa iyang panawagan ug hangyo nga sundon ang balaod, napugos siya pagpatuman sa balaod ilabina nga daghan na ang miadto sa iyang buhatan ug nagreklamo sa gubot nga sitwasyon ug kahuot sa dagan sa trapiko sa Cogon market area kay halos gi-okupar na nila ang tibook kalsada.

 

Matud ni Mayor Klarex nga giusikan sa mga vendors ang kahigayonan nga iyang gihatag ngadto kanila sulod sa upat ka bulan ug tunga ug aron mahatagan sa kaangayan ang katawhan ipatigbabaw gayud niya ang balaod.

“Apan bisan pa man niini, anaa gihapon ang akong pagmahal ug pagsabot kaninyo hinungdan nga nangita kami og paagi aron kamo makabaligya,” matud ni Mayor Klarex.

 

Ang kalihokan gipahigayon diha sa covered court sa Barangay 40 adlaw’ng Martes, Nob. 22, 2022, pinaagi sa inisyatiba sa Night Market Technical Working Group, uban usab sa mga miyembro nga sila si kanhi Konsehal Enrico Salcedo, overseer sa Clenro; Atty. Jose Edgardo Uy, head sa IEC guidelines for night market vending; Engr. Nonito Oclarit, dep’t manager sa Roads and Traffic Administration (RTA); Marfe Dacoco, dep’t manager sa City Economic Enterprises Dep’t (CEED); PCol. Aaron Mandia, City Police Director sa Cagayan de Oro City Police Office (Cocpo); City Administrator Atty. Roy Hilario Raagas; City Legal Officer Atty. Kenneth Tamala, Ms. Bheng Garcia ug Engr. Allan Villalba sa CPSO; Ms. Annie Tongson, dep’t manager sa CSWD, mga barangay officials ug barangay tanod sa Barangay 28, 32, 33, 34, 38, ug 39 nga nagpalibot sa Cogon market area. (ALR/CIO/Photos by Jomar Figuracion/CIO)