Human sa pagbalhin sa mga sidewalk ug ambulant vendors sa bag-o nilang puwesto, gipadayag sa Night Market Team sa pagpangulo ni Mayor Rolando `Klarex’ Uy nga ipatuman na usab niini ang mga gabayan ug balaod diha sa pagpamaligya sugod karong adlaw’ng Martes Nobyembre 29, 2022.

 

Sa panagtigom niadtong adlaw’ng Sabado Nob. 26, 2022, nga gidumala ni kanhi Kagawad Enrico Salcedo isip Overseer, nauyonan sa Team nga sugdan na niini ang pag-karga sa baligya niadtong mga vendors nga nagmagahi ug nagsupak sa balaod ug nagpadayon sa pagpamaligya sa wala gitugot nga lugar.

 

Matud ni kanhi Kag. Salcedo nga gihatagan na ang mga vendors og igong panahon ug pagsabot aron sila makaplastar sa bag-o nilang puwesto apan adunay pipila nga wala nisunod.

 

Alayon niini, subling gihangyo sa Night Market Team ang mga sidewalk ug ambulant vendors ilabina kadtong na-profile ug nakakuha na og puwesto human sa raffling nga didto na mamaligya sa gibalhinan kanila aron dili makarga ang ilang mga baligya. (ALR/CIO/Photo by Reynan Baylin/CIO))